ՀՀ դեսպանը մասնակցել է և ելույթով հանդես եկել IPRCCA միջոցառմանը

26 հունիսի, 2025

Հնդկաստանում ՀՀ դեսպան Վահագն Աֆյանը մասնակցել է և ելույթով հանդես եկել Հնդկաստանի հասարակայնության հետ կապերի և կորպորատիվ հաղորդակցության մրցանակաբաշխության (IPRCCA) միջոցառմանը:

Դեսպան Վ. Աֆյանը, հնդկական հաղորդակցության, մարքեթինգի և մեդիա ոլորտի լսարանին ուղղված իր խոսքում անդրադառնալով հայ-հնդկական հնագույն քաղաքակրթությունների միջև խորացող հարաբերություններին, նշել է ընդհանուր արժեքների հիման վրա զարգացող երկկողմ ռազմավարական գործընկերության մասին:

Ընդգծվել է ՀՀ կառավարության «Խաղաղության խաչմերուկ» նախագիծը, ինչպես Հարավային Կովկասի տարածաշրջանային ինտեգրացիայի, տնտեսական կայունության և երկարաժամկետ խաղաղության հաստատման, այնպես էլ դեպի Հնդկաստան ձգվող ռազմավարական կապի ապահովման հեռանկարի առումով։

Միջոցառմանը որպես պատվավոր հյուր ներկա գտնվող ՀՀ դեսպանն, ընդգծելով Հայաստանի տնտեսության կայուն աճի ցուցանիշները, կարևորել է հնդկական ընկերությունների հետ համագործակցության խորացումն այնպիսի ոլորտներում, ինչպիսիք են տեղեկատվական տեխնոլոգիաները, գյուղատնտեսությունը, դեղագործությունը, վերականգնվող էներգիան, տեքստիլն ու զբոսաշրջությունը՝ ներկաներին հորդորելով ուսումնասիրել «Ներդրումների աջակցման կենտրոն» հիմնադրամի և Հայաստանի զբոսաշրջության կոմիտեի գործունեությունը:

Երկկողմ գործարար կապերի խթանման, զբոսաշրջիկների և մասնագետների հասանելիության ապահովման տեսանկյունից կարևորվել են նաև երկու երկրների միջև ուղիղ չվերթների հաստատմանն ուղղված ջանքերը:

Ելույթի վերջում ՀՀ դեսպանը նշանակալից է համարել միջոցառման մասնակիցների ակտիվ ներգրավվածությունը հասարակական կարծիքի ձևավորման, վստահության ամրապնդման և գործողությունների խթանման գործում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր